اليوم كان سمينارىىىى

يارب لك الحمد فى الأولى والآخرة ... واليوم الحمد لله فى سراء 

مشوار دراستى كتير هربت إنى أتكلم عنه بعد ما جربت طابع طريق العلم فى مصر واللى كنت متخيله إنه فيه تهويل شوية من الباحثين لكن بقيت مجربة خلاص وممكن أى حد يسألنى .. متخافوش مش متشائمة ولا ممكن أعقد حد لكن كمان محبش تبسيط المسائل لدرجة التمميع ..

من فترة كتبت موضوع عن مشوارى الدراسى يمكن بإختصار ويمكن كانت حالتى النفسية تميل للملل والإرهاق أكتر وأكيد كل مشوار مهما كان فيه حجات سلبية وحجات إيجابية وبنمر بالحالتين ... وده كان الموضوع هنا 

لكن النهردة وبعد طول إنتظار كان يوم سمينار تسجيل درجة الماجستير فى إدارة الأعمال 

طبيعة السمينار ممكن كتير ميعرفوهاش وأكيد كمان تختلف من كلية للتانية ومن جامعه للتانية وحتى بين الأقسام فى نفس الكلية 

بالنسبالى حضرت كتير قبل كده فى القسم لزمايلى وكنت بسميها بعد اللى شفته ( حجرة الغسييييل ) وطبعا مفهوم ان الباحث هو اللى بيتغسل والله أعلم بعد الغسيل ده هيتقبل موضوعه ولا لا .... وموضوعه ده مش لسه عارفه يعنى ده ممكن يكون شغال فيه سنين !!! 

عن موضوعى : كنت محدداه من أيام التمهيدى وقدمته فعلا عشان أبدأ فيه كموضوع لمادة بنتدرب فيها على عمل رساله لكن المفاجأة إن الدكتور قالى مينفعش عدليه قلت ماشى وعدلته تانى مرة قالى مينفععععععععش خاااااااااالص ومش عايزة أحكى بقى على الحالة النفسية ان الواحد يكون شغال فى موضوع كام شهر وخلاص قرب نهاية السنة يروح كل اللى فات ولازم ابدأ تانى ومن الأول !!

الحمد لله التمهيدى عدى بس إصرارى إنى أقدم نفس الموضوع للتسجيل والحمد لله كان رئيس القسم إتغير ... والموضوع مشى بعد آراء كتير عدلت فيه لكن كلها كانت فى صياغة العنوان أو حتى طريقة كتابة المنهجية لكن مفيش تغيير واحد غير فكرتى عن الموضوع أو عن اللى ناوية أعمله فيه .... 

وجه النهردة وبعد إستعداد وتوتر لدرجة إنى كنت حاسة إنى مش هعرف أنطق وصوتى هيضيع وناسية كل حاجة .... بدأت بمقدمة وبدأت مناقشة أساتذتى للموضوع .. وحسب كل واحد وطريقته فيه اللى يتكلم ومينفعش ترد عليه !!! وفيه اللى يحدد نقاط مختصرة لكن ذات قيمة ... وفيه إنتقاد وبس ... وفيه اللى يساعدك ويراعى حالتك النفسية ..

لكن عموما البداية كانت جيدة طمنتنى كتير ... كان فيها ثناء على إصرارى على الموضوع والوصول بيه لمرحلة التسجيل.. وجميل أوى كمان إن لجنة القراءة كانوا معايا وبيدافعوا عنى وعن الموضوع وعن مجهودى ومرونتى وفهمى للموضوع ...

الحمد لله عدى اليوم ... ساعه ونص مناقشة .... فى النهاية فيه تعديلات لم تخل بقيمة الموضوع ... ولم يتغير مفهومى وفهمى لما أنوى عمله فى الرساله 

والآن علىّ عمل التعديلات المطلوبة ... وإنهاء إجراءات التسجيل ... ( تسجيل الموضوع بإسمى فى الجامعات المصرية ) والإنتظار حتى تحديد المشرفين على الرساله ... إن شاء الله على أول الشهر الجاى أكون خلاص عرفت 

وتبدأ مرحلة أخرى بحلوها ومرها مرحلة إعداد رسالة الماجستير 

والله المستعااااااااااان 

*****************

لكن بالمناسبة كل اللى يقول مبروك يتفضل شكولاته :)) 

مشوار دراستى

   إبتعدت عن كتابة وتدوين ما عانيته وما أعانيه فى مشوارى الدراسى ، الذى إخترته رغبة وطموحا وحبا ... ثم إكتشفت أنه لم يكن سوى قدرا وأمرا مقضيا ...

   ربما كان البعد عن تدوين تلك المتاعب من باب  أن طريقى الدراسى أصبح كرفيق طريق وصديق عمر ، وأخذا بالنصيحة التى تعنى عدم تدوين ما يسوئنا من رفيق تطول رفقته وصحبته ... وما أطول صحبتى بها ،،،،،

   وكى لا تزيد الهموم وتتراكم كلما تذكرت ، وكى لايصبح تراكم الضيق منها محفز على البعد عنها , خاصة بعد أن علمت وتيقنت أن التعب والإرهاق من طبعها..

فكل من أراد أن يتعلم عليه تحمل الآلام ،،،

   لم أصل بعد لنتائج حقيقية حتى أرى بصدق وعن بعد ما كان فى هذا المشوار الطويل ... لكن التجارب الصغيرة التى مررت بها فيما سبق تثبت أن الأيام عندما تمر ، تمر معها متاعبها ويبقى ما نحققه من إنجازات ، لكن الإنجازات لا تخلو غالبا من بعض المنغصات ، التى ربما تزول بمرور الوقت .. وربما بقيت لتذكرنا بما كان ..

  سيبقى أثرالإرهاق النفسى والبدنى .. وستبقى سنين العمر التى تزيد عاما بعد عام أكبر دليلين على أن ما مر لم يكن دائما يمر بسلام ...

    وهكذا فإن كل ما فى الدنيا ما يعطيك إلا ليأخذ منك الأغلى ويترك أثرا لما أخذه لتظل الذكرى ..

   وتنتهى الحياة وربما نجد أنفسنا لا نملك فى النهاية إلا بعض الذكريات ... لكن التجارب أيضا علمتنا أن الأيام تمر وحتما ستأخذ منا ما تريده ... فإن كنا سنأخذ منها علما وحكمة وتجارب فنحن فى النهاية حققنا مكاسب تقدر بقدرها وبمقارنتها بالوقت والعمر الذى كان فى مقابل الحصول عليها ... 

   وليتنا نستطيع تهوين الصعاب على أنفسنا .... فهى ولابد ستمر بنا ،،، 

.