الخميس، 4 مارس 2010

حلم بساعة صفا




نخلة ورملة وشط بحر ... وموجة جاية من بعيد ... توعد إنها تاخد شوية حزن تبعدهم بعيد ... وسما زارقة صافية ... فيها عصفور رمز لأجمل حرية ... دنيته سما واسعة ... وكلامه أجمل لحن هادى يملا الكون حواليا ... وشمس تغيب وهى بتوعد جاية بكرة فى نفس المعاد ... وليل هادى فيه نجمة بعيدة تضوى بالأمل ... وبدر هل ببسمة ... وصوت الموجة رايحة جاية ...







وعيون تغمض تاخدنى لصورة بنت بضفاير ... شقيه شقاوة عجيبة ... جريانها طيران ... ونظرتها كلام ... وسكوتها تفكير ...

 ويجى المعاد .. معاد شمس وعدت باللقا ولا تخلف معاد ... شقت الظلام ونورت ليل كان هنا ... صبحت على جريدة نخلة فى السما ...صباح الفل ياللى هناك ... أنا جيت بيوم جديد ... ياللابقى ورينى شئ جديد ... خلينى أروَّح مطَّمنه ... الموجة حكيتلى أول ما جيت ... وقالت خدْت منها كتير وبعدته بعيد ... ده كان جبل على قلبها ... لكن خلاص بقى ده كان... خليكى هنا وبلاش تانى تتوهى وسط الزحام ... هنا كل شئ تمام ... نخلة ورملة وشط بحر وموجه وعصفور وليل هادى ونجمة وبدر وشمس منورة وبنت صغيرة ... هتلاقى فين أحسن من هنا ... خليكى جنبنا ...






كان بودى ... لكن خلاص عرفت المكان ... هيفضل مكانى وبلاش تبعدوا ولو بعدت أنا ... لكن الوعد إن مكانى هنا ... مهما تهت فى الزحام أكيد معادنا هنا ... هرجع أكيد بلاش تبعدوا ولا تتفرقوا ... خلو المكان زى ما كان ... مش هغيب كتير أصل هناك كتير ... حزن وألم وفراق وتعب وأحلام بعيدة وزحمة وصوت عال ... وحجات كتير ترجعنى هنا ... ولأن كل شئ بميعاد ... وخلاص بقى جه المعاد ... خلونى أقول سلام ... سلام يا حلمى يا أجمل حلم ...









هناك تعليقان (2):

  1. ازيك
    انا كنت عايزه اسالك
    انتى عندك كام سنه

    حزينه

    ردحذف
  2. اهلا وسهلا بيكى نورتى مدونتى اكييييد

    بس ليه حزينه طيب ؟؟؟

    يمكن السن حسب شهادة الميلاد ناس كتير تشوفه مش كتير لكن العمر الحقيقى بعدد الايام اللى مرت عليكى واتعلمتى حجات جديدة سواء سعيدة او لااااا


    نورتى واتمنى اشوف تعليقاتك دايما

    ردحذف

مرحبا بكل من دخل عالمى