الجمعة، 20 يناير، 2012

اليوم كان سمينارىىىى



يارب لك الحمد فى الأولى والآخرة ... واليوم الحمد لله فى سراء 

مشوار دراستى كتير هربت إنى أتكلم عنه بعد ما جربت طابع طريق العلم فى مصر واللى كنت متخيله إنه فيه تهويل شوية من الباحثين لكن بقيت مجربة خلاص وممكن أى حد يسألنى .. متخافوش مش متشائمة ولا ممكن أعقد حد لكن كمان محبش تبسيط المسائل لدرجة التمميع ..

من فترة كتبت موضوع عن مشوارى الدراسى يمكن بإختصار ويمكن كانت حالتى النفسية تميل للملل والإرهاق أكتر وأكيد كل مشوار مهما كان فيه حجات سلبية وحجات إيجابية وبنمر بالحالتين ... وده كان الموضوع هنا 

لكن النهردة وبعد طول إنتظار كان يوم سمينار تسجيل درجة الماجستير فى إدارة الأعمال 

طبيعة السمينار ممكن كتير ميعرفوهاش وأكيد كمان تختلف من كلية للتانية ومن جامعه للتانية وحتى بين الأقسام فى نفس الكلية 

بالنسبالى حضرت كتير قبل كده فى القسم لزمايلى وكنت بسميها بعد اللى شفته ( حجرة الغسييييل ) وطبعا مفهوم ان الباحث هو اللى بيتغسل والله أعلم بعد الغسيل ده هيتقبل موضوعه ولا لا .... وموضوعه ده مش لسه عارفه يعنى ده ممكن يكون شغال فيه سنين !!! 

عن موضوعى : كنت محدداه من أيام التمهيدى وقدمته فعلا عشان أبدأ فيه كموضوع لمادة بنتدرب فيها على عمل رساله لكن المفاجأة إن الدكتور قالى مينفعش عدليه قلت ماشى وعدلته تانى مرة قالى مينفععععععععش خاااااااااالص ومش عايزة أحكى بقى على الحالة النفسية ان الواحد يكون شغال فى موضوع كام شهر وخلاص قرب نهاية السنة يروح كل اللى فات ولازم ابدأ تانى ومن الأول !!

الحمد لله التمهيدى عدى بس إصرارى إنى أقدم نفس الموضوع للتسجيل والحمد لله كان رئيس القسم إتغير ... والموضوع مشى بعد آراء كتير عدلت فيه لكن كلها كانت فى صياغة العنوان أو حتى طريقة كتابة المنهجية لكن مفيش تغيير واحد غير فكرتى عن الموضوع أو عن اللى ناوية أعمله فيه .... 

وجه النهردة وبعد إستعداد وتوتر لدرجة إنى كنت حاسة إنى مش هعرف أنطق وصوتى هيضيع وناسية كل حاجة .... بدأت بمقدمة وبدأت مناقشة أساتذتى للموضوع .. وحسب كل واحد وطريقته فيه اللى يتكلم ومينفعش ترد عليه !!! وفيه اللى يحدد نقاط مختصرة لكن ذات قيمة ... وفيه إنتقاد وبس ... وفيه اللى يساعدك ويراعى حالتك النفسية ..

لكن عموما البداية كانت جيدة طمنتنى كتير ... كان فيها ثناء على إصرارى على الموضوع والوصول بيه لمرحلة التسجيل.. وجميل أوى كمان إن لجنة القراءة كانوا معايا وبيدافعوا عنى وعن الموضوع وعن مجهودى ومرونتى وفهمى للموضوع ...

الحمد لله عدى اليوم ... ساعه ونص مناقشة .... فى النهاية فيه تعديلات لم تخل بقيمة الموضوع ... ولم يتغير مفهومى وفهمى لما أنوى عمله فى الرساله 

والآن علىّ عمل التعديلات المطلوبة ... وإنهاء إجراءات التسجيل ... ( تسجيل الموضوع بإسمى فى الجامعات المصرية ) والإنتظار حتى تحديد المشرفين على الرساله ... إن شاء الله على أول الشهر الجاى أكون خلاص عرفت 

وتبدأ مرحلة أخرى بحلوها ومرها مرحلة إعداد رسالة الماجستير 

والله المستعااااااااااان 

*****************

لكن بالمناسبة كل اللى يقول مبروك يتفضل شكولاته :)) 


هناك 19 تعليقًا:

  1. مبروك يا قمر .. جميل انك تحسى بإنك عندك شئ عاوزه تعمليه ورغم كل الظروف تثيتى بعملك وحده بعد توفيق ربنا قدرتك عليه
    خوفك وقلقك طبيعى .. لو مش خفتى يبقى عمرك ما هتنجحى .. وعلى فكره .. الخوف والعقبات هما اللى بيخلوا للنجاح ده طعم فى الأخر .. إسأل مجرب :)

    أنا سعيده بيكى وبفرحتك وأتمنى أن تحققى كل ما تتمنيه يارب

    تحياتى :)

    ردحذف
  2. رؤى
    مبروك مقدما والف مبروك على اجتياز التمهيدى انا مقدر تعبك وشفته من خلال مرور ابنتى جيهان بنفس التجربه من صدود وردود ولكن كله يهون فى سبيل تحقيق المنشود وعقبال تمهيدى الدكتوراه

    ردحذف
  3. مها ... شكرا يا جميل ربنا يبارك فيك وعارفه اكيد انه اللى عايز يوصل لحاجة كبيرة بيكون تعبه اكبر لكن توفيق ربنا يهون كل الصعاب الحمد لله



    عمو فاروق ... ربنا يبارك في حضرتك ... ويارب الدكتوراه بشروطها اللى حاطاها لها ههههههه

    ردحذف
  4. السلام عليكم

    سررت جدا جدا من أجلك صديقتي رؤى :)
    وأعجبت بإصرارك على ما تقتنعين به وبجدواه..

    إن شاء الله من نجاح إلى نجاح، دعواتي لك بالتوفيق الدائم

    ألف مبروك ونجاح مبارك بإذن الله

    ردحذف
  5. نسيت أن أشكرك على الشوكولاطة :)

    ردحذف
  6. مبروك حبيبتى وعقبال تمهيدى الدكتوراه
    ايوه كده عايزين اخبار حلوه
    مبروك فرحت لفرحك حبيبتى
    وشيكولاته طعمه ولذيذه بس فين الحاجه الساقعه :)

    ردحذف
  7. نوال.... الله يبارك فيكى حبيبتى ... ولا شكر على واجب واهو النهردة الجمعه كمان :)

    هبة .. الله يبارك فيك وشكرا لروحك الجميله . واكيد الحاجة الساقعه جاية بس تسقع بس هههههه

    ردحذف
  8. الله يا رؤى
    تعرفي انا اكثر شي بحبو بالحياة
    طعم النجاح الاكاديمي
    له نكه لا تشبه اي شيء اخر
    نعم الزواج ليلة العمر
    كما يقولون
    الابناء اجمل شيء بالحياة
    ولهم فرحة خاصة
    لكن لا شيء عندي يماثل
    لذة النجاح في الدراسة

    موفقة حبيبتي
    ربي لا يضيع الك تعب
    بجد افرحت الك
    اوعي تيأسي او تتراجعي
    انا كنت بكمل ماجستير متلك ادارة اعمال
    مع انه البكالوريس تاعي حاسوب
    لكن ظروف الاولاد ما كملت
    لن تتخيلي مدى ندمي
    يا رب توصلي اعلى المراتب
    والمرة الجاي خبرينا اشوية
    عن طبيعة الرسالة

    لك مني كل الحب
    كوني بخير دوما يا رب

    ردحذف
  9. أموله ... سعيدة جدا بكلامك يارب اولادك يحققوا كل اللى مقدرتيش تحققيه
    ربنا يبارك فيك حبيبتى

    واولادك تقدرى تاخدى فى تربيتهم الدكتوراه :)

    وعن رسالتى انشاء الله بس اسجلها ممكن اعرفك العنوان ( لانه لسه هيتغير شوية )

    ردحذف
  10. الأخت الكريمة رؤى ..
    أبارك لك النجاح الجديد ..
    لحظات طيبة نعيشها معك في تحقيق الأمنيات كما لو أنها لحظاتنا ونجاحنا .. وسنة خير إن شاء الله على الجميع ..
    أسأل الله تعالى أن تتحقق كل أمنياتك الطيبة ..
    ألف مبرووك .. مع التحية الطيبة ..

    ردحذف
  11. الأخت الغالية / رؤى

    ألف ألف مبروك

    وعقبال الدكتوراه إن شاء الله

    تحياتى لروحك الطيبة

    ودمتى بكل الود

    تامر

    ردحذف
  12. مربببببببببببوووووووووووووووك

    تتهني يارب ,, ومنها للأكبر

    وين أجي واكل الشوكلاته
    بدنا مركز توزيع بالإردن بليز؟؟

    صباحك خير ,,

    ردحذف
  13. مبروك يا رؤى
    وربنا يوفقك ونقولك مبروك يا دكتوره :)

    ردحذف
  14. ظلالى البيضاء... شكرا لروحك الطيبه وأعلم أنها كلمات صادقه بارك الله فيك ويارب عقبال اولادك ..

    اخى تامر... جزاك الله خيرا وشكرا لتواجدك
    ويارب الدكتوراه :) بشروطها كامله

    ام عمر الغالية . ههههه من عيونى لو اقدر ابعتهالك متأخرش... ربنا يبارك فيك

    نيسان ... اميييييين يارب جزاك الله خيرا حبيبتى

    ردحذف
  15. أمة الرحمان

    مبروك !

    أكيد إذا الانسان توكّل على الله و خاض غمار أي تجربة بمعرفة و عزيمة أكيد أن الله يكرمه .

    تقديري

    ردحذف
  16. ألف ألف ألف مبروك يارؤي بجد شئ يفرح أنك اصرتي على موضوع برافو عليكي ويارب عقبال الدكتوره وساعتها كلنا نحضر ونشوفك احسن إنسانه فى الدنيا:)

    ردحذف
  17. اخى منجى ... شكرا لك ربنا يبارك فيك



    نيلى ... ربنا يخليكى وان شاء الله وقتها الدعوة عامة

    ردحذف
  18. الف الف مبروك

    معلش اتاخرت كنت مريض

    كده اجى الاقى الشيكولاتة خلصت

    مليش دعوة انا عايز شيكولاتة
    عقبال الدكتوراه

    ردحذف
  19. استاذى دى شكولاتة الدنيا متكفيش وجود حضرتك

    الف سلامة على حضرتك يارب الشفاء العاجل كده احنا اللى متأخرين .. عذرا


    تحياتى لحضرتك

    ردحذف

مرحبا بكل من دخل عالمى