السبت، 28 يناير 2012

محدش يركز



يمكن الكلام مش جاى لبعضه .... ويمكن انا نفسى مش هركز .... الكلام ده كتبته فى وقت غريب يمكن بعد الفجر بشوية .... ومن بالليل قبل ما انام حسيت انه فى أى لحظة هبقى عايزة افضفض ... حطيت جنبى كراسه وقلم والموبايل هكتب فى نوره !! ... كتبته ومقرتهوش تانى ويمكن أكتبه ومقراهوش برضه 

المهم إنه محدش يركز ... يمكن يبان مجنون ومش مفهوم .... بس اللى أنا حساه إنه من أعمق ما كتبت ... يمكن عفوى جداا وغريب أوى ... لكن مهم أكتبه عشان يتحفظ بتاريخه ..

التدوينه اللى فاتت كتبتها ويمكن من غير سبب واضح لكن كنت حاسه بحاجة معرفتهاش غير بعد ما كتبت بكام ساعه ... الغريب إنى لما عرفت  سبب الإحساس إتلخبطت ... وطلع الكلام كإنه شخبطه .... 

هنقل اللى كتبته من غير تغيير ....
.
.
.

* غمو عنيه وربطوه فى ساقيه وكان متهيأله إنه ماشى مشوار فى آخره هيوصل ..... وياريتهم ما قالو نكرمه ونفك الغمامة عن عنيه ... أصله لما شاف ملحقش يفرح ... يمكن وقتها حس إنه طور مربوط فى ساقيه ...

*جرفوا الأرض وحولوا الأخضر لإسود ... كان المفروض نمشى من هنا لما الأخضر مبقاش موجود ... لكنه إتغير وإفضلنا إحنا راضيين بالسواد اللى ملا الأرض .... فضلنا لعند ما الإسود بقى زباله ...

* العقل بيقول السبب يجى الأول وبعدين يكون فيه حاجة تحصل لكن مش دايما كل حاجة تمشى بالعقل .... كتير بنحس بحاجة وبعدين نعرف سببها .... لما تحس دوَِن وإستنى السبب أكيد جااى ...

* حاجة تغيظ وتجيب ضغط إنك تكون واضح ويكون القائد المفروض عليك من النوعية المترددة اللى دايما واقفه فى النص حتى فى كلامها . يارب إبعدهم أو إعدلهم أو خدنىىىىىى ...

* غبى أوى اللى يقول عرفت فلان ... أنا معرفتش حد ( بلحق نفسى ) وبما إنى معرفتش حد ... فأنا لا أثق بأحد لدرجة أن أعطيه ما يجعلنى أعتز بنفسى ( قلبى وعقلى ) ... عفوا بس أعرفك هتلاقيك عرفتنى ... عفوا كنت حذره وأصبحت منغلقه لا أريد أن أعرف المزيد ... فالجزء الذى عرفته جرحنى ..... 

* النور قطع ... بيقولوا أحمال زايدة لازم تتفرغ ..... ممكن العقل كمان نوره يقطع شوية ؟؟

* عايزة أجرى فى مكان معرفش فيه حد أبدا ... محستش بأمان وسط اللى أعرفهم ... يمكن الأمان ده سافر لمكان معرفش فيه حد . وحاورينى يا كيكه ... غلب حمارى .... أو حمارهم ... أو هما نفسهم اللى غلبوا ...

* بيقولوا هادية هههههه الحكاية إن راس السهم إتكسرت ..

* كل يوم أنام وأنا متهيألى إنى هصحى على بكره ألاقينى الصبح صحيت على إمبارح !!! معرفش إمبارح هو اللى طويل أوى كده ولا بكره اللى سافر سفر طويل ...... ومعرفش هيرجع ولا مش ناوى ... وهفضل أصحى على إمبارح 


*** كلامى مش تخاريف ده الواقع .... بس لو ركزنا فيه هتكون آخر مرة نعيشه ... ويمكن آخر مرة نقابل عقلنا قبل ما يسافر **** 


كانت هنا / رؤى 
بكامل قواها العقليه 


هناك 9 تعليقات:

  1. رؤى ..
    بلاش تركزي إنتي كمان ..

    هي كده استغماية .. بس مش بتنتهي إلا لما الحياة تبقى .. هوب .. خلاص انتهت .

    الأرض اللي هي أرضنا صارت هيا كمان غريبة .. مش عارفين إيه اللي اتغير فيها .. اللون أو الناس أو حاجات تانية مش قادر أقولها ..

    العقل .. عن قريب جداً يدخل تحت تهديد الانقراض .. لن شيئاً مما يدور بنا أو حولنا لا يمت له بصلة .. الدنيا صارت جنان خالص ..

    اننا نكون واضحين يعني إن عدونا يعرف كل أسلحتنا .. واحنا عارفين كده كويس .. بس رغم كده إحنا بنفضل واضحين علشان إحنا كده الوضوح سمتنا وفي دمنا ..

    المعرفة .. بنعيش غرباء في وسط ناس بيعرفونا وبنعرفهم .. وبنشوف أهل بس هم غرباء .. لكنهم بكل المعاني أهلنا وبنلاقي نفسنا معاهم ..

    النور في الأيام العصيبة دي بيتقطع على طوووول .. ويمكن ده واضح من كلامنا وتدويناتنا ..

    السفر ده صار شيء مسيطر علينا .. رغم إني عمري ما كونتش أحب السفر .. بس المره دي .. السفر لعالم تاني تماماً .. يمكن بلوغر بيشكل أحد أركانه ..

    راس السهم عمره ما يتقطع .. بس هو بيستريح شويا ..

    بين امبارح واليوم بنتمنى إن بكره يحمل معاه براءة وطهارة امبارح .. ولو صحيتي على كده ... ابقي صحيني ..

    كلماتك أثارت شجوني أو جنوني أو فنوني .. مش عارف ..
    بس برده كان هنا محمد .. بس مش عارف إذا كان لسه فيه بقية عقل .. هههه

    ردحذف
  2. الأخت الغالية / رؤى

    أعتقد إن 90% من المصريين بيعانوا من الأحاسيس دى وفى الفترة دى بالذات (وأنا منهم).

    نصيحة من أخ لأخته .. متفكريش كتير .

    كلنا مؤمنين بالقدر وعارفين إن الظلم من صنع البشر . لكن فيه رب عادل شايف ومتطلع على كل شيىء.

    ربنا سبحانه وتعالى قال " وبشًر الصابرين " وقال " إن بعد العسر يسر " وكررها مرتين للتأكيد.

    لو فضلنا مستسلمين لليأس مش ح تجنى غير التوتر والإحباط والإكتئاب.

    وبعدين ماهو لازم ربنا سبحانه وتعالى يختبرنا ويشوف الصادق من المنافق.

    دائما أستمتع بما أقرأة هنا.

    خالص مودتى

    ردحذف
  3. كل يوم أنام وأنا متهيألى إنى هصحى على بكره ألاقينى الصبح صحيت على إمبارح !!! معرفش إمبارح هو اللى طويل أوى كده ولا بكره اللى سافر سفر طويل ...... ومعرفش هيرجع ولا مش ناوى ... وهفضل أصحى على إمبارح
    عارفه ده معناه ايه ان الايام كلها بقت شبه بعضها روتين وساقيه بتلف بينا مفيش جديد بكره زى النهارده والنهارده زى امبارح
    حلوه الفضفه وحلو التخريف ولو انه مش تخريف

    ردحذف
  4. عزيزتي رؤى ...

    كلماتك حائرة و تائهة ،
    أتمنى أن تكوني بخير ،

    دمت\ بخير ،

    تحيآتي لك ...

    ردحذف
  5. اعتقد انه مش بكامل قواكي العقليه ﻻ هو بكامل احزانك وشجونك وخواطرك التي تغلب عليها السواد والليل الطويل
    ساعات ويطلع النهار وتلاقي كل شيء بلونر رغم سواد الليل

    ردحذف
  6. رؤى
    """"" كل يوم من الايام متهيألى انى هصحى على بكرة الاقى بكرةزى امبارح
    لكن لما هقول هقابله بكره وبعد بكره وبعد بعده هلاقى بكرة مش زى النهارده ولا زى امبارح لان فيه حاجة هتربطتى ببكره اسمها الحب

    ردحذف
  7. ظلالى البيضاء ... شكرا لمرورك وأعلم محاولتك التخفيف لكنى بخير الحمد لله
    لا أعلم حدود كلمة بخير لكنى اعيييش

    شكرا لك

    ***********
    اخى تامر ... شكرا لدعمك كلماتك جميله
    ويسعدنى مرورك عندك حق ربنا يختبرنا فعلا الحمد لله ولعل يسراااا قادم

    *********

    .هبه... صحيح وده اللى قصدته وحسيته فعلا كل الايام بقت شبه معضها من سنين وهى كده ... تحياتى لك

    *********

    دعاء ... بخير الحمد لله لكنها ليست حائرة هى كذلك فعلا كله داخل فى بعضه

    *********

    وصف .. :)) هو كده فعلا لكن بحاول افضفض عشان بس اتخلص من جزء وافضى مكان للجاى كل يوم ... وهتعدىىى

    *********
    عمو فاروق ... لو لاقينه كنا عرفنا ان بكرة جاى واتمنينا يجى بعد والسنة الجاية :))


    شكرا لكم

    ردحذف
  8. مساء الغاردينيا أمة الرحمن
    عارفة عمر الكلام الي نكتبه مايبقى تخاريف او مجرد حرف على الورق كل حاجة بنكتبها من إحساس معين سواء حزن او فرح او هم او ذكرى مرت عارفة كل كلامك هنا بجد له معنى وخاصة حكاية امبارح والنهرده الايام لو مابقاش فيها احساس بيحسسنا بجمالها ووجودها مش حنحس بيها وهيعدي النهرده زي امبارح "
    ؛؛
    ؛
    ربنا يجعل ايامك كلها فرح وسعادة
    لروحك عبق الغاردينيا
    كانت هنا
    reemaas

    ردحذف
  9. صباح الفل ريماس
    يارب تكونى بخير حبيبتى

    كلامك صح فعلا عندك حق لكن كتير بنكتب الكلام ونهرب من الافصاح عن معناه :)

    دمت بكل خير

    ردحذف

مرحبا بكل من دخل عالمى